Народныя забаўлянкі

Коцік-коцік-коцік, 
Цёпленькі жывоцік. 
Кіці-кіці-кіці, 
Востранькія кіпці. 

*** 

Тра-та-та, 
Тра-та-та, 
Выйшла кошка за ката, 
За катом ёй добра жыць, 
Бо не трэба тапкі шыць. 
Мякенькія лапкі – 
І не трэба тапкі! 
 

*** 
Пайшоў каток у лясок, 
прынёс каток паясок. 
Пайшоў каток на ганачак, 
прынёс нам абараначак. 
Пайшоў каток на рыначак, 
прынёс каток разыначак. 
Пайшоў каток на таржок, 
прынёс каток піражок. 
Пайшоў каток на вулку, 
прынёс нам хлеба булку 

 

*** 
Кую-кую ножку, 
паеду ў дарожку, 
куплю чаравічкі, 
малы, невялічкі, 
кую, кую другую, 
паеду ў даўгую. 
Дарожка –даўгая, 
а ножка – малая. 

*** 
Ладкі ладком, 
Піражкі з мядком, 
Кашка з алеем, 
Есці не ўмеем.

*** 
Ладу-ладу-ладкі, 
Пабіліся бабкі 
За камок цеста 
Пасярод места, 
За скарыначку 
Сярод рыначку. 
А вы, бабачкі, 
Вы не біцеся, 
Вы купіце піражок, 
Памірыцеся! 
 

*** 
Сарока-варона 
кашу варыла, 
дзетак карміла, 
гэтаму – дала, 
гэтаму – дала, 
гэтаму – дала, 
гэтаму – дала, 
а гэтаму – не дала. 
Ты самы малы, 
вады не насіў, 
дроў не калоў, 
круп не малоў. 
Бяжы да крыніцы, 
прынясі вадзіцы, 
усім нам напіцца – 
тады дам табе кашы. 
Тут пень, тут калода, 
тут мох, тут балота, 
а тутака крыніца – сцюдзёна вадзіца 
пацякла-пацякла-пацякла!